Letia San Roccu

Sott’à a prutizzione di San Martinu è San Roccu, Letia hà una storia ricca,  da a lighjenda medievale di a creazione di u castellu di Catena versu u 800 à a spantichera di u paese da i Genuvesi, in 1543, par via di a resistenza di i so paisani.
U paese si sviloppa è à u principiu di u vintesimu seculu, hè pupulatu da più di 1000 abitanti. Ciò chì spieca a ricchezza di u paese è u so patrimoniu tradiziunale in leia cù l’attività agrupasturale. (forri, fragni, pastricciali…)
Hè chivi, à mezu à u Parcu Naturale Regiunale di Corsica, à più di 2093 metri, nant’à u tarritoriu di Letia, ch’ellu nasce u Liamone.
À l’occasione, fate casu à una particularità geulogica di u paese. À nant’à u fiume chì traversa a cumuna, ci hè un astracu altu di dece metri chì piglia a forma d’un arcu, hè chjamatu l’Arcu di a Catena.
Partendu da Letia, ci sò parecchje spassighjate (Mare à mare nordu, chjassi pedagogichi da sinsibilizà i spassighjadori à a prutizzione di l’ambiente) è chjassi cumunali chì ci parmettenu di raghjunghje i paesi di Rennu, i Bagni, a Soccia, Vicu, Murzu è u Niolu.